Aneu Dara Mita Reubong

Bak saboh jameun masa uroe nyan, hudep keuh saboh keuluarga sederhana. Dalam keuluarga nyan na sidroe mak ngoen dua aneuk dara yang mulai balegh. Mak jih nyan ka tuha, semeuntara lakoe geuh ka trép meuninggai. Keu udep si uroe-uroe, mak tuha nyan keureuja jeut keu tukang mita gutee bak ulee gob. Aneuk dara jih tiep uroe mita reubông lam uteun. Reubông nyan di publoe, seubagian geupeujeut keu gulee. Gampông nyan memang mahsyu deungoen gulee reubông.

 Alkisah bak si uroe, watee geutubiet dari lam uteun bak mita reubông ngoen oen paku, bandua aneuk daranyan diseut?t lee sidroe aneuk agam. Bak hi agamnyan ureueng kaya. Bak geukaloen dua aneuk dara tari tubiet lam uteun, agam nyan geuseut?t sampee trôh u rumoh si Dara.

  

Trôh rumoh si Dara, geukaloen keu aneuk dara nyan tinggai dalam jambô, agam kaya nyoe han geuteujeut tamoeng. Si Agam woe balek u rumoh geuh ngoen teumanyoeng- manyoeng lam até.

  

Sing?h beung?h jih, si Agam nyan jak lom meulum dua aneuk dara gasien nyan. Geukaloen lom bandua dara nyan tamoeng lam uteun. Si Agam geuseut?t laju sampé trôh lam uteuen. Agam nyan geuperhati but si Dara. Bak geulum dari seumak-seumak, geukaloen keuh aneuk daranyan teungoh geupoet reubông ngoen oen paku. Watee woe geuseut?t lom dari likot sampee trôk u rumoh si dara lom.

  

Lageenyan keu sabee tiep uroe. Agam kaya nyan sabee geulum dua dara tari aneuk janda gasien gampong nyan. Bak si uroe si Agam han ék geutheun lé. Akhéjih bak saboh watee si Agam jijak u rumoh janda gasien nyan. Meunan geutamoeng lam rumoh, si Agam laju geu ungkap asoe até. Geupeugah keuh jih keuneuk meukawen deungoen salah saboh aneuk dara nyan. Bansaboh rumoh teukeujôt bak jideungoe meuheut agam kaya nyan. Phoen that mak si Dara han geupatéh haba si Agam, tapi si Agam geupaksa laju meuheut meukawen ngoen aneuk janda nyan. Akhéjih janda nyan teupaksa geujôk aneuk gobnyan nyang tuha geupeukawen lee agam nyan. Yôhleuh meukawen si Tuha woe ngoen lakoe. Lam jambônyan jioe tinggai janda tuha sidroe dua ngeon si Tulôt.

  

Uroe meugantoe uroe, umu janda nyan meutamah tuha. Akhéjih janda nyan sakét. Jinoe janda tuha nyan teu éh bak teumpat éh hana ék meumètle. Gobnyan geukeumiet lee si Tulôt, seumeuntara si Tuha hantom lé gewoe u rumoh. Si Tuha ka udép seunang dua ngoen lakoe di gampông meurandéh.

  

Kareuna breueh di rum?h ka abéh, janda nyan geuyuo si Tulôt jak u rumoh akakjih jak lakee breueh si’at. Si Tulôt jak u rumoh si Tuha. Bak akakjih nyan, si Tulôt geuceurita teutang keudaan mak gobnyan nyang sakét. Geukheun lee si Tulôt, “Mak tanyoe lakè breueh dua neuk. Mak jinoe teung?h sakét.”

  

Meunan geudeungoe haba si Tulôt, si Tuha geujaweub, “Mangat mantoeng lake-lake breuh bak gob, peu kah piké breueh nyoe kuteumee lageenyan mantoeng?! Hana lam donya nyoe nyang mangat nyan gratih, mandum peurlee but, peurlee reuôh.”

“Tapi mak nyang lakee, Kak. Mak tanyoe teung?h sakét.” Geuseuôt lee Tulôt.

“Kapeugah bak mak kah, keurja ilee, barô loen jôk breuh.” Kheun si Tuha.

  

Singkat haba, si Tulôt jiusé lee akakjih. Si Tulôt woe u rumoh ngoen rhoe ie mata. Trôh u rumoh, bak jikaloen mak jih mantoeng bak teumpat éh, si Tulôt han jiteujeut peugah keujadian bak rumoh akakjih. Si Tulôt geumeusom bak dapu. Bak binèh sinungkee geuduok sira jipeutheun ie mata.

  

Bak geudeungoe na ureung moe bak dapu, si Janda nyang mantong bak teumpat éh geumariet. “Hai, Tulôt, peukeuh kah nyang di dapu? Pakoen g?hlom kajak bak akak keuh?”

Na meupadum g? mak nyan geuulang haba-haba soet sabeub hana jaweuban dari dapu. Ka na meupadum g? geudeungoe, barôlah si Tulôt geuseu?t dari dapu. “Siatreuk loen jak bak akak, mak.”

  

Meunan geudeungoe suara Tulôt lagee ureueng moe, mak jih geuteumanyoeng lom. “Peu kapubuet teuma di dapu nyan? Pakoen kamoe, Neuk?”

  

“Koen uloen moe, Mak, mata loentuan jitamoeng abee. Loen teungoh peugléh dapu.” Seuôt si Tulôt.

  

“Kajeutnyan, kajak ilee bak akakkah, entreuk kapeugléh teuma.” Kheun mak jih lom.

Si Tulôt jak lom u rumoh si Tuha. Trôh rumoh si Tuha, si Tulôt jiusé lom lee si Tuha. Na meupadum goe si Tulôt jak-jak woe dari rumoh jih u rumoh akakjih meulakee breueh. Tapi sabee jiusé lee akakjih. Akhéjih si Tuha geukheun bak adekjih. “Jeut kah peuwoe breueh loen, menyoe kah katém keurja bak loen.”

  

“Peu keurja nyang jeut loen pubuet, Kak?” Kheun si Tulôt.

  

“Kamita gutee bak ulee loen trôk ‘an abéh, euntreuk loen jôk breuh si khai keukah dua ngoen mak.”

  

Bak jipiké keu mak nyang sakét, si Tulôt Akhéjih geutém mita gutee si Tuha. Lageenyan keu sabee jeut-jeut uroe. Si Tulôt jak u rumoh akakjih keu mita gutee. ?h si Tuha meurasa ka abéh gutee bak ulee jih, barô geujôk breueh si khai keu si Tulôt. Breueh nyan geupuwoe laju lee si Tulôt u rumoh geuh. Trôh u rumoh, breuhnyan geutaguen dua ngoen poma.

  

Bak si uroe, teung?h geumaguen di dapu, si Tuha geurasa gatai that ulee jih. Bak geugarôk-garôk ulee, jiteumee saboh gutee teusangkôt bak gukee. Bak geukaloen mant?ng na gutee bak ulee jih, si Tuha meurasa keunoeng pengeut lee adekjih. Meunan lheuh bu, si Tuha laju jak u rumoh mak jih.

  

Bansaree trôh di rumoh makjih, si Tuha laju geuteumeunak. Si Tuha geuteunak adekjih sira jiklik-klik meuhoi si Tulôt. “Hoi Tulôt!!! Ka kapeungeut kee kah nyoe?! Patkah?! Bèk kameusom, katubiet bagah! Hoe kamè breueh kee?!”

  

Meunan geudeungoe su si Tuha teumeunak, makjih nyang mant?ng lam sakét teukeujôt bukoenlee wayang. “Peuna aneuk loen? Pakoen gata?” Kheun mak nyan keu si Tuha.

“Hoe aneuk kureueng ajanyan! Ceubeueh that jih jipeunget loen, heu?! Tulôt kureueng aja… katubiet bagah!!!” Kheun Si Tuha lom.

  

Bak geudeungoe nanjih sabee-sabee geuteu’?h, si Tulôt tubiet dari dapu. Meunan geukaloen si Tulôt tubiet, si Tuha meutamah beungèh. Laju geutarék bajee si Tulôt.

“Aneuk cangklak, cukôp galak bak kapeungeut kee! Hoeka kah mee breueh kee. Kapulang bagah keunoe!” Kheun si Tuha sira geutarék ôk si Tulôt.

  

“Breueh nyan koen kaleuh akak jôk bak loen dua ngoen mak? Kaleuh loen taguen keu mak, ka kamoe pajôh.” Seuôt si Tulôt teumakôt.

  

“Aneuk glang teutak, cukop cangklak bak kapeugah haba. Uloen bri breuehnyan meunyoe keureuja kah ka seuleusoe. Peu keneuk kapeungeut kee, kah?! Bunoe kuteumee mant?ng sabohtreuk gutee bak ôk loen.”

  

“Jadi pakiban, Kak? Breuh nyang akak bri bunoe kaleuh kamoe pajôh dua ngoen mak. Singoeh uloen mita lom gutee akak.” Kheun si Tulôt lom.

  

Si Tuha beungèh bukoenlee wayang bak geudengoe seuôt si Tulôt. Si Tuha geuyue bak mak ngoen adekjih nyan geupeumuntah lom breueh nyang kaleuh dipajôh. Kareuna han mungkén geumuntah lom, si Tuha jak u dapu jak cok aweuk. Deungoen aweuk nyan, geukurèk babah makjih ngoen babah adekjih.

  

“Han kupeuizin breueh loen kapajôh. Peutubiet mandum breuh loen bunoe.” Kheun si Tuha sira gekurèk laju reukung makjih ngoen reukung si Tulôt.

  

Dari dalam babah si Tulôt ngoen makjih jitubiet darah. Akhéjih bandua awaknyan hana meudaya lé. Geukaloen awaknyan hana lé daya, barôlah si Tuha geuwoe u rumoh geuh.

Alkisah, si Tulôt hana lé dijak mita gutee u rumoh akakjih. Jinoe si Tulôt gisa lom lam uteun jak mita reubông. Tapi malang naséb si Tulôt, ka rab abeh ban saboh uteun jiwét, g?hlom jiteumee lom bak trieng nyang mantoeng meureubông. Rata-rata kajeut keu trieng.

  

Si Tulôt dijak wét laju ban saboh uteun. Kaleuh geuniet lam até han geuwoe sig?hlom meuteumee reubông. Jih hana ék lé jikaloen pomajih jimoe kareuna hana geupeuwoe reubông. Si Tulôt teutap meuusaha. Bak geuwét-wét, geukaloen keuh saboh rimbôn bak trieng. Bak geupeutoe, deuh sibak bak reubông nyang raya. Até si Tulôt bahagia bukoenlee. Tapi ?h jikaloen reubông nyan, até teuh meubah teumakôt. Bak bak reubông nyan meulilét saboh uleu Lhan itam nyang raya.

  

Lam até si Tulôt meuheut that meuc?k reubông nyan. Sabeub kaleuh jikeuliléng ban saboh uteun hana meureumpok meisibak reubông pih. Tapi bak jikaloen uleu nyang raya nyan, harapan jih sirna. Si Tulôt geud?ng bak teumpat jih sira meudo’a lam até uleunyan beujijak sigra.

  

Bak teung?h geud?ng-d?ng, si Tulôt teukeujôt ngoeng saboh suara. “Neucok keuh loentuan ikôt deungoen gata.” Kheun suara nyan.

  

Si Tulôt geukaloen seuseulingka, tapi hana deuh meusidroe manusia. Bulee kudôk jih jibeudoh. Suara nyan meusue lom. “Neucok keuh loentuan ikôt deungoen gata.”

Si Tulôt meutamah takôt sabeub hana jiteumee meusidroe ureung di seulingka. Bak geukaloen keudéh keunoe, mata si Tulôt meureump?k keuh ngoen uleu nyang na bak bak reubông nyan. Tulôt geukaloen bak uleu nyan. Jideungoe lom suara nyang sama lagee bunoe. “Neucok keuh loentuan ikôt deungoen gata.”

  

Barôlah meuphoem jih, suaranyan nakeuh dari uleu nyang na bak bak reubông nyan. Uleunyan geumarit lom, “Neucok keuh loentuan ikôt deungoen gata.”

Deungoen ragu-ragu, si Tulôt geupeutoe uleu nyan. “Peukeuh beutoi gata nyang mariet bunoe, wahai uleu?” Tanyoeng si Tulôt.

  

“Beutoi that. Neucok keuh loentuan ikôt deungoen gata.” Kheun uleu nyan lom.

  

“Pakiban cara uloen ba gata?”

  

“Bukoenkeuh gata keuneuk cok reubông nyoe? Kuoh reubông nyoe, bek neukoh, euntreuk luka tubôh loen. Kuoh dari dalam tanoh sampee ukheujih. Lheuhnyan cabôt reubông nyoe. Neubakeuh uloentuan deungoen reubông nyoe u rumoh gata.”

Ban lheuh geudeungoe haba uleu nyan, si Tulôt laju geukuoh bak reubông nyan. ?h lheuh nyan, reubông ngoen uleu nyan geupuduk di ateuh oen eumpeuk. “Pakiban lom?” Tanyoeng si Tulôt bak uleu.

  

“Neupeuwoe loentuan u rumoh gata. Reubôh tubôh loen saree reubông nyoe. Reubông nyoe bèk neucang. Peutamoeng laju lageenyoe lam beulangoeng sare tubôh loen.” Kheun uleu.

  

Meunan lheuh geudeungoe haba uleu nyan, si Tulôt geupeuwoe saree uleu ngoen reubông. Ban saree trôh rumoh, reubông ngoen uleu nyan geureubôh seusuai haba uleu bunoe. Ka cukôp trép si Tulôt jiprèh reubông nyan, tapi bèk keumasak, meu jue g?lom ie lam beulangoeng. Bak geuprèh-prèh masak reubông nyan, si Tulôt rôh geuteungeut bak teumpat duk geuh.

  

Meunan teujaga dari teungeut, kon wayang teukeujôt si Tulôt. Dapu jih ka meuubah. Bansaboh rumoh ka meuubah ceudah. Bintéh rumohjih ka meukilat. Bak saboh sagoe rumoh, meuumpang-umpang breuh teupuduk di sinan. Di ateuh meja ka teupuduok bu leungkap deungoen teum?n bu. Rumoh jih ka meubah leungkap deungoen seugala keubutuhan udép.

  

Si Tulôt teukeujot, laju geupluong bak kama mak jih. Leubèh teukeujôt lom jih meunan trôh bak kama mak jih. Di ateuh teumpat éh, mak jih ka teuduk sira tahé-tahé syit. Deuh keu geukaloen lee si Tulôt lapék teumpat éh mak jih ka meuubah meukilat lagee kulét uleu. Si Tulôt teuingat keu uleu ngoen reubông nyang jireubôh bunoe. Laju jiplung lom u dapu. Meunan trôh u dapu, geusalop laju tôp beulangoeng, tapi hana geuteumeung lé reubông ngoen uleu bunoe.

  

Si Tulôt tahé teud?ng bak binèh dapu. Tahé na, seunang na, tuemakôt pih na. Bak teungoh bingoeng-bingoeng teudeungoe bak jih saboh suara dari lua. Suara di lua geubri saleum. Ban saree jideungoe suara nyan hi suara uleu nyang direubôh bunoe, si Tulôt laju jiplung u lua. meunan trôh bak pintô, jikaloen lee si Tulôt sidroe aneuk agam teud?ng bak babah pintô. Agam nyan meupakaian rapi ceudah lagoina. Bak ulee jih meuikat ija itam meubinték-binték putéh, hi kulét uleu Lhan.

  

Agam nyan geubri saleum lom, geulakee izin tam?ng lam rumoh. Ban saree trôh lam rumoh, dikeu si Tulôt ngoen mak jih, agam nyan meungaku seubagoe pangeran nyang meenyamar jeut keu uleu Lan bak watee si Tulôt jak cok reubông. Jadi uleu nyang meulilét bak reubông bong nyan nakeuh droe pangeran nyan. Kareuna keusucian até si Tulôt, pangeran nyan keuneuk meukawén deungoen si Tulôt. Meunurut Pangeran nyan, meunyoe bunoe si Tulôt geucang reubông nyan, mungkin Pangeran ka maté. Tapi kareuna kesucian até si Tulôt nyang mat amanah, reubông nyan hana dikoh. Kareuna nyankeuh pangeran meulakee si Tulôt beujeut keu peurumoh gobnyan.

  

Singkat haba, bandua pih meukawén. Jinoe rumoh janda nyan ka jeut keu rumoh meugah. Macam-macam keubutuhan udép na bak rumoh gobnyan. Gobnyan pih udép bahagia deungoen si Tulôt ngoen lakoe jih. Janda nyan puléh dari saket jipeuubat lee si Pangeran. Rumoh awaknyan ramee geukunjông lee ureung gampông jak lakee tulông. Awaknyan pih sabé geutulông ureueng-ureueng gampông nyan. Hantom geutulak meunyoe na jamee trôh u rumoh.

  

Seumeuntara aneuk janda nyan nyang tuha jinoe udép meularat. Lakoe jih hana lé keurja. Lakoe si Tuha ka sakét, seumeuntara hareuta geuh ka habéh. Breueh hana lé di rumoh. Jideungoe lee si Tuha jinoenyoe mak ngoen adékjih ka jaya, si Tuha jijak u rumoh mak jih keuneuk lakee tulông.

  

Bansaree trôh di rumoh mak jih, si Tuha jipeugah haba, “Baroekoen awak droen meulakee tulông bak loen, jinoenyoe loen teuma meulakee tulông bak gata. Neujôk loen breueh meu dua neuk.” Khuen si Tuha.

  

Geuseuôt lee si Tulôt, “Baroekoen mak peureulee breuh, neuyu loen keureuja bak gata. Nibak uroenyoe kamoe bri breuh keu gata, peu keureuja nyang jeut gata pubut keu kamoe? Peukeuh gata keuneuk kurèk lom reukung kamoe?”

  

Bak geudeungoe haba si Tulôt, si Tuha malee keudroe. Akhéjih si Tuha jiwoe u rumoh geuh. Breuh hana jiteumee, malee nyang jirasa.

  

Sahibul hikayat, bak peutheun malee, si Tuha hantom lé jijak u rumoh mak jih. Bahkeuh hana breueh di rumoh, jipeuteun deuk dua ngoen lakoe. Na meupadum trép lheuhnyan, si Tuha pih maté di rumoh droe dua ngoen lakoe kareuna bak peuteun deuk ngoen malee.

  

Seumeuntara si Tulôt udép bahagia ngoen sang lakoe. Geurawat mak droe deungoen gaséh sayang. Hana tuwoe syit geutulông ureueng gampông nyang jak u rumoh gobnyan.

  

Meunankeuh jikeun lee haba jameun, nyang g?t bak ureungchik meuteumeung beurkah, nyang khianat meuteumeung laknat. Si Tulôt pih meuteumee nikmat. Seumoga na beurkah nyang jeut ta cok dari calitra nyoe